ភ្នំពេញ៖ មន្ត្រី ក.ប.ប. ដកហូតពីទីផ្សារទំនិញចម្រុះ និងប្រហិតចម្រុះអនុលោមតាមបទដ្ឋានបច្ចេកទេសប្រមាណ ១៣០គីឡូក្រាម។

ក្នុងគោលបំណងបន្តគាំពារសុខុមាលភាព និងផលប្រយោជន៍ដល់ប្រជាពលរដ្ឋ មន្ត្រីអធិការកិច្ចម្ហូបអាហារ ក.ប.ប. សាខាខេត្តតាកែវ កែប កំពង់ធំ សៀមរាប រតនគិរី បាត់ដំបង បន្តអនុវត្តភារកិច្ចរបស់ខ្លួនអនុលោមតាមច្បាប់និងបទប្បញ្ញត្តិជាធរមាន ដោយបានចុះអង្កេត និងត្រួតពិនិត្យទំនិញចម្រុះគ្រប់ប្រភេទដាក់លក់នៅលើទីផ្សារ។

មន្ត្រីជំនាញ នាថ្ងៃទី១៨-១៩ ខែកញ្ញា ឆ្នាំ២០២៣ បានត្រួតពិនិត្យការដាក់លក់ផលិតផលសម្រាប់ចិញ្ចឹមទារកនិងកុមារ(ម្សៅទឹកដោះគោ) ឃើញថាអនុលោមតាមបញ្ញត្តិនៃអនុក្រឹត្យលេខ១៣៣ ស្តីពីការផ្សព្វផ្សាយលក់ផលិតផលសម្រាប់ចិញ្ចឹមទារកនិងកុមារ។

ជាមួយគ្នានេះ មន្ត្រីជំនាញបានរកឃើញទំនិញចម្រុះ រួមមាន ប៊ីចេង នំកូនក្មេង ចាហួយ សាប៊ូដុសខ្លួន ទឹកជ្រលក់ ហួសកាលបរិច្ឆេទប្រើប្រាស់ ខូចគុណភាព និងជាពិសេសប្រហិតចម្រុះពុំអនុលោមតាមបទដ្ឋានបច្ចេកទេសក្នុងការវេចខ្ចប់ សរុបចំនួន ១២៧.៨៣គីឡូក្រាម។

ទំនិញពុំមានអនុលោមភាពទាំងនោះត្រូវបានមន្ត្រីជំនាញក.ប.ប. ដកហូត ដើម្បីបន្តនីតិវិធីនាពេលសមស្រប និង បានចែកនិងបិទផ្ទាំងរូបភាពអប់រំផ្នែកម្ហូបអាហារ(Poster) អំពីរបៀបទុកដាក់ទំនិញ និងរបៀបមើលកាលបរិច្ឆេទប្រើប្រាស់ មុននឹងទិញមកឬដាក់លក់ផងដែរ៕